Gajil,Gecil,گجيل
 

گجيل

 
شعر
يازيلار - مقاله لر
اسماعيل جميلينين شعرلري

     صمد عمي  ناغيللارا قوشولدو 

 صمد بهرنگي نين نيسگيللي خاطره سينه اتحاف    ياز 97

 

يوبانيردي    سانکي گونش   اوسحر                     اوفوقو توتموشدو قارا دومان چن

آراز بويو سوسان لال اولان قوشلار                     ياشيرديلار   گلن آنلاري   ارکن

 

آيريليقدان   آيري  دوشه  بيلمه ين                       لاله لرين  باغري  دولو قان ايدي

نرگيزين گؤزوندن سؤزن داملادا                        قايالار اوچوران بير طوفان ايدي

 

کيم دئيردي سئللر سارادان  سونرا                       خان چوبانين   تله قويوب  يولونا

آرازين گؤرونمز    بوروخلاريندا                       صمدين   حياتي  چاتاجاق   سونا

 

اوگون گؤزو يولدا     قالان سهندين                     دادينا    چاتمادي    ساوالان   بابا

يوخسول اوشاغلارين اومود چراغي                    کند   اوخوللاريندا   يانمادي  داها

 

اوغورلاندي     چنلي بئلين قير آتي                     مصري قلينج چيخماز اولدو قئنيندان

سارايلاردا  ظاليم خانلار   گولرکن                    بير جنگي گلمه دي  آشيق   جنوندان

 

بير شافتالي آيري دوشدو  مينيندن                        خيردا    قارا باليق  ايتيردي   يولون

قار داناسي   يالقيز قاليب   اريدي                       سوسوزلوق قوروتدو تلخونون کولون

 

اؤلوملو  سورگونلو ايللردن سونرا                     او بير چراغ  ايدي يولا  نور ساچان

ديلي باغلي  اسير اولان     ائللرين                     قورتولوش  يولونون  اؤنونو  آچان

 

سئوگي دولو آرزي دولو بير گونش                    آرازدا  باتسادا  او گون    بير آندا

صمد عمي     ناغيللارا   قوشولدو                    آدي   اؤلمز   اولدو     آذربايجاندا

 

 اسماعيل جميلي

 

گجيل سايتي ركلاملاري وئريلن سايتلارين محتواسيندان سوروملو دئييل.
 بو ركلاملار ايراندا ، آذربايجان سايتلارين آرتيق راق تانيتديرماق اوچون بوردا ويريليب ديلار.



گجيل سايتي لينکي وئريلن سايت يا يازيلارين محتواسيندان سوروملو دئييل.

E-mail : webmaster@gajil.20m.com
Copyright © 2003-2004.