|
|
نه اولور
سيرالاييب بيره‌ر-بيره‌ر درديني
عؤمرون، گونون قارا قيلما نه اولور
باخ گول-چيچک بزه‌يه‌جک کرديني
قارا قيشي اوزه چالما نه اولور
خوش‌گؤرويله اولايلاري گؤر‌گيلن
عؤمور پايين سئوگي ايله سور‌گيلن
آرزولارلا گونو گونه هؤر‌گيلن
ديبسيز درينله دالما نه اولور
ياشام انيش-يوخوش يولدور دوز دگيل
مين ديرينين ياشاياني يوز دگيل
هنر ايستر ياشاماغا سؤز دگيل
اومود چيچکلرين يولما نه اولور
چؤل-چمني قارا قارغا سارسا دا
ياز چاغيندا باغچا بويو قارسا دا
دان يئرينده قارا بولود وارسا دا
بويون اگيب قالخان سالما نه اولور
کؤچمه‌ليدير قارا قيش بو دياردان
سن اينجيمه نرگيز گؤزلو نگاردان
کوسمک اولماز يوبانسا دا باهاردان
گؤزله گولوم وقتسيز سولما نه اولور
باخ گونشي ياشاديري اولدوزلار
قار چيچگي دئير يولدادير باهار
يولونو گؤزله‌ين خوش گونلر ده وار
گؤزلرينه سؤيله دولما نه اولور
اسماعيل جميلي
|
