يوسف کنعانه گلير

غيب دن يئتدي بيزه مژده کي جانانه گلير

نازنين زلف پريشانه چکيب شانه گلير

عزت و شوکت ايله اول بت فرزانه گلير

قيل تماشا گوزوم اول سرو خرامانه گلير

توکمگه عاشيقي نين قانيني مردانه گلير

اولدي مايل يئنه بير آفت دورانه کونول

آز قاليب شعله چکيب عشق اودونا يانه کونول

جان فدا ائيله گيلن اول شه مردانه کونول

باخيبان سئير ائله اول مه تابانه کونول

قيل تماشا گوزوم اول مهر درخشانه گلير

ائيلدي ماه رخي عاشيقيني ياد گئنه

اولدي ويرانه کونول مژده دن آباد گئنه

دل اولوب غصه و غمدن بو گون آزاد گئنه

باده ي وصل رخ يارايله دلشاد گئنه

مي وحدتدن اولوب گور نئجه مستانه گلير

روز اول کي گوزوم اول مه تابانه باخيب

گوزونون ياشي ايله دجله لر عمانه آخيب

اشکيمين دانه سي گردنينه عقده ساليب

قدي خجلت اودونا سرو خرامانه ياخيب

اوزي صد طعنه ويريب يوسف کنعانه گلير

گل بيخار آچيليب گلشن جان ايچره بو گون

روح تک جلوه ائدير ملک روان ايچره بو گون

يوخ اونون تک داها بير شاه جهان ايچره بو گون

عدل کسراني قيليب کسر شهان ايچره بو گون

شوکتي وئردي شکست تخت سليمانه گلير

اي خوش اول دم کي شهيم عاشيقيني ياد قيلا

لطف ايله رحم قيليب صيديني آزاد قيلا

ملک اسلامي ترحم ايله آباد قيلا

دشمني خار ائديب دوستلاريني شاد قيلا

تا ذليل ائلييه کفاري مسلمانه گلير

حيران خانيم