طبيعت الهاما چاغيرير مني

يئنه ده يام- ياشيل گئييبدير داغلار

گوز کيمي دورولور قاينار بولاقلار

ارييير گونئي لر دوشونده کي قار

ياغيش دا ايسلادير او گوي چمني

طبيعت الهاما چاغيرير مني!

اوره ک ديل آچير کي سونمه ميش اودوم

هجوما باشلايير منيم سوز اوردوم

کونوللر مولکونده مين يودا قوردوم

اونوتماز عالمده سئوه ن- سئوه ني

محبت الهاما چاغيرير مني!

گوروره م، دان يئري يئنه سوکولور

گويدن يئر اوزونه نورلار توکولور

زمي لر، تارلالار اوزومه گولور

گوزومده سارالير سنبلين دني...

بو نعمت الهاما چاغيرير مني!

من يارانماميشام گويلر اولادي

ازلدن شهرتيمدير تورپاغين آدي

بو عشقيم چوخونا قسمت اولمادي

شاعريم آز پايلا سوز خزينه ني

شعريت الهاما چاغيرير مني!

او کيمدير کولونکي داغ کيمي وورور...

کئچيجي بايراق دا يانيندا دورور

گوروره م، او يئني بير دونيا قورور

لقمانلارا يازاق بو قرينه ني

بو حکمت الهاما چاغيرير مني!

جار چکير چرخلرين چاخناشيق سسي

قيزير بالتالارين پولاد پنجه سي

ياتمايير موغانين، ميلين گئجه سي

سسله نير وطنين چولي، چمني

بو قدرت الهاما چاغيرير مني!

چوللره مين دسته کومسومول گلير...

دئه، کور دن، آرازدان نئچه يول گلير؟

آي ائللر موغانين ايلي بول گلير

صحرالار امر ائدير: ياز بو صحنه ني

بو تهمت الهاما چاغيرير مني!

يوز داغين قوينوندا بير دنيز واردير

چنارلار ساحيلده قاتار- قاتار دير

همدميم لپه لر، گوي دالغالاردير

اوچور قاييق لارين ايپک يئلکني

بو سرعت الهاما چاغيرير مني!

شيرواندا سايريشير باغلار- باغاتلار

شنليکلر يانيندا کيشنه يير آتلار

آخير قشون- قشون ائللر، ائلاتلار

اليله کشف ائدير هر دفينه ني

بو صنعت الهاما چاغيرير مني!

موغانا سو گلير، ميله سو گلير

آخيشيب اوز ائلي، اولوسي گلير

تورپاغا انسانليق آرزوسي گلير

باغريما باسيرام آنا وطني

بو الفت الهاما چاغيرير مني!

اوره ک ديل آچير کي، سونمه ميش اودوم

هجوما باشلايير منيم سوز اوردوم

کونوللر مولکونده مين يووا قوردوم

اونوتماز عالمده سئوه ن- سئوه ني

محبت الهاما چاغيرير مني!

صمد وورغون