شانلي بابك قالاسي

سينه گه رييب گردن چكن

ظاليم لرين بئلين بوكن

بولادلارين باغرين سوكن

شانلي ((بابك)) قالاسي يام

باشي اوجا قالاسي يام

يئلين كوكسون سوكه- سوكه

گويلره باش چكه- چكه

آديمدا يوخ ذره لكه

قوشدان قاناد سالاسي يام

شانلي ((بابك)) قالاسي يام

يئر اوزوندن ظولمو سيلن

معتصم لر قلبين دلن

تاريخيني اولو بيلن

اوجا داغلار لالاسي يام

شانلي ((بابك)) قالاسي يام

من سيغمارام هر بوداغا

بير چيراغام گلن چاغا

افتخارام ((قاراداغا))

يئنه باجلار آلاسي يام

شانلي ((بابك)) قالاسي يام

دونيا ائشيتسين سسيمي

آزالدمارام هوسيمي

يارالانميش ايلان كيمي

خايين گوزو چالاسي يام

شانلي ((بابك)) قالاسي يام

((خوشنام)) سوسما بئله گاهدان

الين اوزمه تك آللاهدان

عدالت سيز اولان شاهدان

يئنه تاج لار آلاسي يام

شانلي ((بابك)) قالاسي يام

محرم وليپور