|
باش توتمايان سئودا
شاگيردلر:
ايسته ييرسن كي معلم! بيز اوركدن باريشاق
آغزيميزدا ديليميز وار، قوي او ديلده دانيشاق
مدنيت بوروموش علم له دونيا اوزونو
داها تنبل ليگي آت، گل گئجه- گوندوز چاليشاق
معلم:
اشتباه ائيله مه يين، وار هر ايشين قاعده سي
او
شيرين يئرلي ديلين، مركزه يوخ فاييده سي
امر ائديبلر كي سوخام آغزينيزا جبرا بو ديلي
دونيادا((فارس)) ديلي دير جمله ديلين والده سي!
شاگيردلر:
اي
معلم! اونو اورگنمه يه يوخ طاقتيميز
آنا ديلده دانيشيب- گولمك اولوب عادتيمنيز
چوخ بويوك دير او ديلي قويما گيره آغزيميزا
بيز تصور ائله ديكجه ده گيشير حالتيميز!
معلم:
سيز اوشاقسيز، نه بيليرسيز آي اوغول ياخشي- يامان
خوراساندا بو ديله حرمت ائدير پيروجوان
اونلارين خاطيرينه، سيزده گره ك اورگنه سيز
سوزومو رد ائله سيز، دولت ائدر باشقا گمان!
شاگيردلر:
آي
معلم! بير اوتان ري لي، گيلانلي دئييليك
ائليميز، يوردوموز آيري، گاوالانلي دئييليك
آذرستاندي بيزيم ميللتيميز، تاريخه باخ
معده دن سويله ميريك، فيكري دومانلي دئييليك!
معلم:
منه تاريخ اوخوماق ايندي ياراشماز بيليرم
دوزو، لاپ زور- زوراكي حاققيزي انكار ائديرم
ديليزي ترك ائله ييب ايندي گره ك ((فارسلاشاسيز))!
آديزي تاريخين اول ورقيندن سيليرم!
محمد بي ريا
|
