|
ستارخان و مشروطه بايرامي
قولاق آسين يئنه سويله ييم ائللر
بو شانلي اولكه نين سعادتيندن
سيزه كاهن كيمي وئريم خوش خبر
رشيد اوغوللارين رشادتيندن
قرنلر بويو، بو يورد، بو توپراق
چوخ بلالر چكيب ظاليم اليندن
ظولمون پنجه سينده اولوب اويونجاق
سيزيلداميش يازيق نااميد وطن
نهايت بو وطن بير اوجا سسله
چاغيردي دادينا نوجوانلاري
اونون دوره سينه بويوك هوسله
توپلاندي تبريزين قهرمانلاري
دئديلر حققيني قويماريق باتا
دوشدولر ايگيت لر دويوش مشقينه
قيلينجي باغلاييب، مينديلر آتا
آزادليق عشقينه، وطن عشقينه
صف- صف دايانديلار مقابيلينده
نااميد آنانين، مرد اوغوللاري
انتقام كلمه سي ازبر ديلينده
تاپيلدي ميللتين بويوك سرداري
محبتله وطن باخدي سردارا
گوردي شجاعتلي پهلوان دير او
بيلدي هئچ بير زمان او دوشمز دارا
چونكي جسارتلي قهرماندير او
سويله دي: گل اوغول، ياپيش اليمدن
گوزومون ياشيني سيل اته گين له
چاليش ظولمكاردان خلاص اولوم من
سئوينسين اوره گيم، شاد اوره گين له
ائشيتجك بو سوزو غيرتلي سردار
باشيندا توكلري دوردو بيز كيمي
دونيا گوزلرينده اولدو تيره- تار
جوشدو دالغالانميش بير دنيز كيمي
سويله دي: اي آنا، اي بويوك وطن!
اليمده اسلحه، ديليمده اسمين
گلديم امدادينا شجاعتله من
گوزلريمده غضب، اوره گيمده كين
قوچ كيمي ايگيت لر گيردي ميدانا
مستبد سلطانا ائتديلر قيام
مشروطه آلديلار بوتون ايرانا
خائينه عشرتي قيلديلار حرام
وطنين سويمه لي، ايش بيلن اوغلو
((ستارخان)) دئييلن ناموسلو سردار
ظاليمين اوزونه باغلاييب يولو
سلطانين قلبيني ائتدي داغدار
بو گون اي وطنين رشيد ائللري
او تاريخدن كئچير ايندي قيرخ بئش ايل
بيزيم خلقيميزين ايگيت ليكلري
گونش تك بولوتدا گيزله نن دئييل
غاليب گلمه يه جك، بيلين خيره، شر
بيزه بيرليگيميز وئره جك نجات
وار اولسون حقيقت، وار اولسون بشر
وار اولسون آزادليق، وار اولسون حيات
((محمد بي ريا))
|
