قاراداغ
دونيا قرار توتوب ساكين اولاندان
چوخ بلالر چكيب
باشين، قاراداغ
آلنيندا كي هر ايز
بير قرينه دير
بيلينمير تاريخين،
ياشين قاراداغ
اوره كدن چكديگين
فرياددي، آهدي
ديله يين، ايسته يين
خالقا آگاهدي
هر قايان دويوشده بير
قرارگاهدي
سويله يير تورپاغين،
داشين قاراداغ
ظاليملر ديليني سنين
باغلاييب
سينه ني يوز يئردن
ياريب، داغلاييب
قلبين ديله گليب،
گوزون آغلاييب
آخيب گول اوزونه
ياشين قاراداغ
تبريز بير آنادير
سنده اوغلوسان
ائل بيلير اوره كدن
اونا باغليسان
ستارخان كوچه لي سينه
داغليسان
اودور كي آغاريب
باشين، قاراداغ
سنين له اوجالار
ائللرين سسي
دايانيب آرخادا
اودلار اولكه سي
سارابين، اورمونون
گلير نعره سي
كوردوستان تك وار
قارداشين، قاراداغ
ائلين بير زامان
اوجالار سسي
اوخونار يوردومدا ظفر
نغمه سي
اوپنده گونشين ايستي
نفسي
قيزينار گديگين،
قاشين قاراداغ
گولر هر بير داشين،
هر بير اويلاغين
سردارلار يئتيرر آنا
توپراغين
((جاوان حسين)) الده
توتار ياراغين
قورخماز دونيا اولسا
قوشون، قاراداغ
جاوان حسين
|
