|
اوخويان تبريز
آشيق جاوان ساريلميش دي سازينا
توي قورموشدو دونه نينين ياسينا
او، درديني يا سينديرا يا سينا
غضبي كوكله نيب داغين- داشيندا
تبريز آغلاييردي داغلار باشيندا
حئيرتيندن دونموش ايدي دلي داغ
نفس چكيب ايشقيريردي اود- اوجاق
گوي مو يئري يئرمي گويو اوداجاق
بولودلار اوفوقده الي قاشيندا...
تبريز آغلاييردي داغلار باشيندا.
دلي ميضراب "بختي كمي" اويادير
غم حئيرتي، حئيرت غمي اويادير
اوزو يانيب، بو عالمي اويادير
بير سائيل بختي يوخ مين بير ياشيندا
تبريز آغلاييردي داغلار باشيندا
فرياديندان قويون- قوزو دوروخدو
آغلايان سو
داغلايان سو دوروخدو
قارا يئلين سئل اوموسو دوروخدو
دره لر سنگ ايدي ياز ياغيشيندا
تبريز آغلاييردي داغلار باشيندا
تبريز آغلاييردي- دئديم... نه دئديم؟
آغلايان بير سازين طالعينه دئديم
ساري ياماجلارين سئلينه دئديم
آغلاماز سوز يوردو داغلار باشيندا
تبريز اوخويوردو داغلار باشيندا
قاري ننه، نئهره ن دوندو چاتمادا
گيزلي آهين فلك لره چاتمادا
هجر آنا، هجر آنا، چات دادا
تبريز آغلاييردي داغلار باشيندا
تبريز اوخويوردو داغلار باشيندا
آغلاسا، آغلاردي ايلديريم كيمي
گورشاد ساچي يولان سيلديريم كيمي
قاپيپ شيمشك لري بير شيريم كيمي
نغمه توخويوردو داغلار باشيندا
تبريز اوخويوردو داغلار باشيندا
آغلاسا، آياقدا توفنگه دونر
بالاسي وورولان پلنگه دونر
بير دره آغيزلي نهنگه دونر
دومانلار ياس قوردو داغلار باشيندا
تبريز اوخويوردو داغلار باشيندا
مممد آراز
|
