مهپاره قاييتسين

يا رب کرم ائت اول بت مهپاره قاييتسين

بير رحم ائله سين بو دل بيماره قاييتسين

بو دل کي اونا منزل ايدي اولدي خرابه

عزم ائتسه اگر يار داخي هاره قاييتسين

شانه چکيبن چين- چين ائله سال اوزه زولفون

قلاب کيمي اوجلاري رخساره قاييتسين

مرغ دل زارم گئنه آواره قاليبدير

زلفون خمين آچ تا کي بو آواره قاييتسين

گل رحم ائله قوي عاشقي بير ياره يئتيشسين

عرضين ائله سين اول بت خونخواره قاييتسين

چون کوکب بختيم يئتيشيب نحس مقامه

بير امر ائله تا ثابت و سياره قاييتسين

عهد ائت ائده سن جانيوي سن صدقيله قوربان

((حيران)) يار اگر بيرده بو گلزاره قاييتسين

حيران خانيم