اينسان- قايالار

بير قايايا سويكنميشم

دئييرم كاش:

باخ بئله جه داشا دونم

ياواش- ياواش

طالعيمي قايالارين طالعينه

باغلايام كاش

بيرجه انسان دوشونجه مي، ساخلايام من

داش آياقلي، داش اللي بير انسان كيمي

ائنيب داشدان- داشا دوشه م

قايالارين لال ديليني باشا دوشه م

اونلارين داش قولاغينا بير داش آتام

قايالارين گئچميشيني

قايالارا خاطيرلادام

دئيه م: بير واخت اينسان اوغلو

اينسان اولوب بو قايالار

اينسانلارين نعره سيندن

دوغولوب دور بو قايالار

نر ايگيتلر دوشمن اوسته گئدن زامان

بابالاردا باش قالديريب يئر آلتيندان

قايا كيمي-

داياق اولوب، يومروق اولوب

اوخ اولوبلار

قايا دوشلو قهرمانلار

قاياليقدا يوخ اولوبلار

بو تورپاغين طالعينده او د ا ائله

بير گون ايدي.

ايگيتلرين ياشاماسي داش اولماقلا

مومكون ايدي

يوخسا اونون قيسمتينه هاردان دوشه

بو قدر داش

دانيش گوروم آ داش قارداش!

سيز ننه مين باجيليقي

سيز بابامين قارداشليغي

قهرمانلار سپدييي بير زمي سانيم

 بلكه ائله بو داشليغي

سيز ائي قديم افسانه لر

شعريمه ياغ، سسيمه ياغ

نه زمانسا بو داشلارلا

بير ديل تاپان تاپيلاجاق

بو داشلارين، قايالارين

گئچميشيني اوياداجاق

اوردو- اوردو قاياليقلار

اينسانليغا قاييداجاق

بو باسيلماز نرلر- ارلر

بو قايا سركرده لر

اوندا مني بير بالاجا داش عسگري

قويار يقين

قوشولماغا بو جرگه يه

قايالارين گئچميشيني

قايالارا يازديم، دئيه

اوندا وطن سانار مني

بير بالاجا وطن داشي

وطن داشي اولماياندان

اولماز اولكه وطنداشي...

مممد آراز