قول چکه جگم...

مدنيت دئييم، وحشي ليک دئييم

کيملري قيناييم، ائله ييم قارغيش

بو نئجه قانوندور محکوم ائله ييب

مني، بو دونيادا آياق قويماميش؟

ايستيرديم بير باشي اوجا داغ اولام

يونوب ائله ديلر بير مزار داشي!

ايستيرديم دوم- دورو بير بولاق اولام

دئديلر: اولاسان گرک گوز ياشي!

بونو مندن ائشيت ياراسا قوشو!

بير بئله اورتمزلر گونون اوستونو

اولما، سيگارئت دک کيم سني اوپسه

وئره سن آغزينا آجي توستونو!

پيس گونده وئريرسن قاباغا مني

مني ال سانيرسان، اوزونو ده گوز

بونو بيل بوگونون صاباحي دا وار

اوزو، اوزگه سايما، اوزگه لري اوز!

چکديگيم بو آهلار بولودا دونر

حيات سونبولونو شيمشکي بيچر

زمزمه، کوثره اگيلمه ين باش

گوررسن کي بير گون ايرين، درد ايچر

بو يانان قلبيمي توتوب اليمده

نورويلا ظولماتدا يول چکه جه يم

يالين آياغيمدان سوزولن قانلا

اوجا زيروه لره قول چکه جه يم

گونئيلي