|
غيرت
كيتابلار اوخودون مكتب بيتيردين
نئچه معلميمه امتحان وئردين
وظيفه تاختينا چيخاندان بري
گزدين شهرلري، مملكت لري
گورورم، ماشالله، بول ساوادين وار
هر
يئردن، هر شئيدن معلوماتين وار
بونلاري بيلمكله چوخ اويونمه سن
خبرين وارمي دير بس اوز- اوزوندن؟
اوز دوغما كنديندن
اوز ائل- اوباندان؟
اصليندن، كوكوندن، اولو باباندان؟
بويوك داهيلري ازبر بيليرسن
اوزگه لر اونونده چوخ اييليرسن
دئه نئچون؟
بيليك دن، ساواددان قاباغ
غيرت ايسته ييرم من سندن آنجاق
بيليك آلينما دير، بيلييه نه وار
اونو زحمت له ده قازانماق اولار
چتين دير غيرتي سعيله قازانماق
اگر ماياميزلا بير دوغولماسا
واللاه، بيليك لرين بير فايداسي يوخ
اونو خرجلمه يه غيرت اولماسا
آختارما ادادا، گوزدن سن اونو
سانما كي، او سنين اوز الينده دير
غيرت پالتار دئييل، گئييه سن اونو
غيرت غيرتلينين عملينده دير
آمما غيرتينين ناقص لييين دن
شيكايت ائله ين گورمه ميشم من
كاش ائله بير جهاز كشف ائديلئيدي
قاندا كي غيرتي اولچه بيلئيدي
اوندا شرف سيزلر رتبه يه مينمز
اوندا عمل اوچون سوزه نه حاجت
اوندا اوز يئريني توتاردي هر كس
قاپيلار داليندا قالمازدي غيرت.
((بختيار وهاب زاده))
|
