گئچه جك بيزيم دير ، گله جك بيزيم

بير زامان بو ائلدن دومرول تك ارلر
بير زامان جوان شير ، آردينجا بابك
بو ائلين ، بو يوردون دوشما نلارينا
گوريلاييب ،شاخيبلار ايلديريملار تك

كور اوغلو نعره سي هله قولاقدا
جينگيلدير خانلاري اولدورون دييه
ستار خان باش اوجا ديله يير اولوم
ذلّتله قالماغا سوئله يير نيه

قوچ نبي قوسدوروب قان ، ياغي لارا
قاز ديريب آزادليق آدين ديللره
نيگار لار ـ هجر لر ـ زينب پاشا لار
سويكه نيب تاريخده چنلي بئلره

بيزيم ائل چوخ يئتيب قوچاقلار ، ارلر
قورخولو قورخويا ، قورخو سالانلار
ظلماتلار اونونده گئجه ايله ، ياريش
قيزيل تئل گونش دن ، بايراق آلانلار

اينديسه بيزلره گركدير گره ك
قورو ياق بو ائلين امگين هر آن
سيلديره ك بو ائلدن بو ئو لكه ميز دن
بو غو لموش چن ايله ، تو تو لموش دومان

قوزانا گره كدير كور اوغلو سسي
اوزان لار دوشونده بسله نن سازدان
نبي نين آت اوسته هي ووران سسي
دينله نه بسته لي موغام آوازدان

بابكين قيلينجي آذر بايجانين
يوكسه لديب آديني يازدي دو نيادا
ايندي نين قيلينجي قانلي قلم دير
گره كدير قلملر گلسين فريادا

بو چاغدا بيزيم ائل بيليك بيلمه لي
گئچميشين بسله ييب صاباحين دويسون
گئچه جك بيزيم دير گله جك بيزيم
ائل بونا اوره گده ايناملا اويسون
 

حيدر والي