عزيز وطنيم

بسله نير قلبيمده سونسوز حورمت، آذربايجانا

ايسته رم دونياده من حوريت آذربايجانا

سانمايين اوز يوردومون اسرارينا بيگانه يم

من اونون سوداي عشقيندن بوجور ديوانه يم

شمعه بنزر، دوره سينده فيرلانان پروانه يم

قويمارام اصلا قويولسون منت آذربايجانا

شاعيرم بير بولبولم من، آشيانه مدير وطن

سئيرگاهيم دير افقلر، خوابگاهيم دير چمن

چولده بيتميش لاله لر، داغلاردا آچميش ياسمن

هر بيري وئرميش يئنه بير زينت آذربايجانا

بير گوزلدير سئوديگيم كي، حسنونون حيرانيام

من اونا تعريف يازان شاعيرلرين قوربانييام

بيلميرم صوفي پرستم، عارفم، روحانييام

قائلم معناده من، بير قيمت آذربايجانا

من خيانت ائتمه ديم مرحوم اولان اجداديما

ارث تك وئرديم بو يوردو، قهرمان اولاديما

حفظ ائديب بو اولكه ني، باش اگمه سين جلاديما

اونلارين آوازي وئرسين، شهرت آذربايجانا

پايدار اولسون گوروم اودلو آلاولار تورپاغي

دالغالانسين شانلي بورجوندا عدالت بايراغي

قصردن خوشدور منه هر داخماسي، هر چارداغي

بسله نير قلبيمده سونسوز حرمت آذربايجانا

 محمد بي ريا