دورنالار
هانسي درد دير ائدن سيزي
باغري قان
اي بو يئردن اوچوب گئدن
دورنالار؟
سيز كي آزاد دوغولدينيز
آنادان
غمگينسينيز دئيين نه دن،
دورنالار؟
گويده آزاد قاناد چالماق
گوزلدير
ائل دردينه قاليب، يانماق
گوزلدير
آنا يوردا قوربان اولماق
گوزلدير
نه يه گره ك جانسيز بدن
دورنالار؟
يامان گونين عمري البت،
آز اولار
قيشدان سونرا بهار اولار،
ياز اولار
بو ائللرين كيفي اوندا
ساز اولار
سيز اي غمگين- غمگين اوته
ن دورنالار!
بولاق كيمي ايشيلدايير
گوزينيز
دوستونيزام، بيليزسينيز
اوزينيز
سينه لره داغ چكير هر
سوزينيز
اوره كلري آل قان ائدن
دورنالار!
اوچورسينيز آلني آچيق،
اوزي آغ
باغريم چاتلار سيزدن
آلماسام سوراق
يورولاندا اولور سيزه
اوتوراق
گول كناري، ياشيل چمن
دورنالار!
قاققيلداشين، قوي
ياتانلار آييلسين
ازيلنلر قالخيب آدام
ساييلسين
شهرتينيز بو ائللره
ياييلسين
اي باش ويروب گولده چيمن،
دورنالار!
آرزوم بودور، كسيلسين گوز
ياشينيز
هر بلادن اوزاق اولسون
باشينيز
چيچكلنسين توپراغينيز،
داشينيز
توخونماسين سيزه دوشمن،
دورنالار!
بير گون گلر، اوره گينيز
آچيلار
دومان كيمي اوچوب گئدر
آجيلار
باغرينيزي نشان آلان
اووچيلار
قوي بيلسينلر، سيزدنم من،
دورنالار!
چوخ چكمز كي، نغمه سويله
ر شن ديللر
عطر ساچار شوخ چيچكلر،شوخ
گوللر
بايقوشلاري عوض ائدر
بولبوللر
خرابه لر اولار گلشن،
دورنالار!
زمان سيله ر اوره كلردن
ناله ني
ائل اونودار گوز ياشيني-
ژاله ني
ياشيل چمن بايراق ائدر
لاله ني
اوترسينيز اوندا شن- شن،
دورنالار
اگر بير گون داردا قالسا
بو ائللر
درد اليندن ناله ائتسه
كونوللر
آهدان يانيب كوله دونسه
بو چوللر
من وئره رم سيزلره دن،
دورنالار
قوي كونوللر سئللر كيمي
چاغلاسين
آغ گونلره مين بير اميد
باغلاسين
قويمايين كي، قان- ياش
توكوب آغلاسين
بو يارالي آنا وطن،
دورنالار!
سليمان رستم
|
