|
بيرده مني دوغماياجاق داها آنام
بو آغ ساچلار بيرده
قارا اولماياجاق،
بيرده كيمسه
گؤرميه‌جك من جاوانام
اؤتن گونه، عؤمره
چاره اولماياجاق
بيرده مني
دوغماياجاق داها آنام
* * *
بونا يوخ‌دور ذره
قدر گمان بئله
آللاه گؤيدن لعل،
جواهير، قيزيل سپه
بو دونيايا
دؤنميه‌جك آنام بئله
باري آنا ياشايايدي
ايكي دفعه
* * *
عشق اودونا
يانماياجاق بيرده سينه‌م
ايلك گؤروشه
دوشميه‌جك بيرده يولوم
كيم دؤنوب‌كي بو
دونيايا من ده دؤنم
هانسي آهيل جاوان
اولوب من ده اولوم
* * *
فاني دونيا، سنه
حئييف، چوخ اينانديم
آنا سودو، اؤلوم
سويو ايچه ـ ايچه
ايللر اؤتدو سونرا
دوُيدوم، سونرا قانديم
يوخوايميش،
خيال‌ايميش، هر شئي دئمه...
* * *
بيرده منيم
آچماياجاق چيچكلريم
قير آتلاريم، دوُر
آتلاريم اولماياجاق
قووماق ايچون
آرزيلاريم، ايستكلريم
اوُچماق ايچون
قانادلاريم اولماياجاق
* * *
پنجره‌مدن نور
يئرينه تاداش گلير
بودا عؤمرون
مؤهورلري، سوُرقوچلاري
سيله بيلمز جراح
گله، نقاش گله
اوز ـ گؤزومه
واخت‌سيز دوشن قيريشلاري
جابر نوروز
|
