Gajil,Gecil,گجيل
 

گجيل

 
شعر - ناغيل
يازيلار - مقاله لر
اسماعيل جميلينين شعرلري
 

دريا ائله دين

شهريارا يئنيدن خلقت عظما ائله دين

شاختا ويرميش باغي سن جنت ماوا ائله دين

بال دوداغدان سوزولن سوزلري صهبا ائله دين

       ((توركي بير چشمه ايسه سن اونو دريا ائله دين

        بير سويوق معركه ني محشر كبرا ائله دين))

 

چوخدانيدير باغيميز اولموشدور گوللنمز

چال تيكان بولبولي لال ائتميشدير ديللنمز

گنج ويرانه ده قويلانميشدير بيللنمز

         ((بير ايشيلتي ايدي سها اولدوزو تك گورسنمز

          گوز ياشينلا سن اونو عقد ثريا ائله دين))

 

سئويرم كي بو جهان سن كيمي انسانلا دولا

زعفران تك ائليمه كج باخانين رنگي سولا

سوزلرين تورك ائلينه وئردي قيلينج ياپدي قالا

      ((اومودون واركي بو دريا هله اوقيانوس اولا

       اونا ضامين بو زمينه كي مهيا ائله دين))

 

سنه هر شعر يازان روتبه ده همتا اولماز

هر سيزان چشمه گليب دالغالي دريا اولماز

شعريوين ميثلي كيمي شهد مصفا اولماز

      ((عرفانا چاتماسا شعرو ادب، ابقا اولماز

       سنده عرفانا چاتيب شعريوي ابقا ائله دين))

 

سوزلروندن او قارانليق گئجه ده پارلادي آي

پارلاياركن ائله دي زيل گئجه نين فيكريني زاي

يوخلاميش بير ائل اوچون آچدي گونش قوپدي هاراي

      ((ابديتله ياناشدين دوغولا حافيظه تاي

      شيرازين شاهچراقين تبريزه اهدا ائله دين))

 

ائليمين گولشنين ائتميشدي صفاسيز طاغوت

يوردوما شاختاتك اسميشدي وفاسيز طاغوت

درديم اولدوقجا، قويموشدو دواسيز طاغوت

       ((توركونون جانيني آلميشدي حياسيز طاغوت

       سن حيات آلدين اونا حق اوچون احيا ائله دين))

 

سنده اوز قبله وي حق ائله دين حافيظ تك

تانريدان درديوه درمان ديله دين حافيظ تك

گرچي دونيا آغاجين سنده يئدين حافيظ تك

       ((فيض روح القدس اولدي مددين حافيظ تك

        سنده حافيظ كيمي اعجاز مسيحا ائله دين))

 

 ائليمين گول دوداغيندان يانا گئتميشدي گولوش

اهرمنلر آرادا شادليغي ائتميشدي بولوش

قارداشا زورپا وئريرديرله كي قارداشلا دويوش

     ((قمه قداره لر آغزيندا ديل اولموشدو سويوش

      سن شكر قاتدين اونا خنجري خورما ائله دين))

 

آنا ديلده يازيلان آثاريوي كيمسه سوزور

اينجي لردن قولاغا بير ابدي سيرغا دوزور

اشعارين سوت گولودور اوردا ملك لردي اوزور

      ((ايندي گوللرده گوزل صفله وصفاايله گزير

      منجلابلاردا اوزن اوردگي دورنا ائله دين))

 

سن علي عاشيقي اولدون ائده رك حققه طواف

تانري بخش ائتدي سنه طبع روان، سينه ي صاف

ميللتين دوشمني قورخوندان ائدنمزدي خلاف

     ((باخ كي حيدربابا افسانه تك اولموش بير قاف

     سن كيچيك بير داغي سرمنزل عنقا ائله دين))

 

من گركدير كي سهند يوردونو آباد ائده ليم

ساحرين روحونا مين فاتحه ايراد ائده ليم

يوللارين ايزله يه رك روحلاريني شاد ائده ليم

     ((بوردا روشن ضميرينده قلمين ياد ائده ليم

      سن اونوندا قلمين طوطي گويا ائله دين))

 

آذري توركجه سينين قووزادون عرشه علمين

دالغالاردان قوتاريب ساحيله گتدين بلمين

احسن اولسون بئجه رن سن كيمي بير بولبوله مين

     ((نه تك ايراندا سنين ولوله سالميش قلمين

     باخ كي توركييه ده قافقازدا نه غوغا ائله دين))

 

اوزيوه من كيمي پروانه لر اولموش واله

گوزيوه ساقي ميخانه لر اولموش واله

سنه مجنون كيمي ديوانه لر اولموش واله

       ((باخ كي تهراندا نه فرزانه لر اولموش واله

        باخ كي تبريزده نه شاعيرلري شيدا ائله دين))

 

روستمين حسرتي قالدي سن اوچون قوينون آچا

راحيمين عشقي گويرچين ساياغي قالخدي اوچا

گلدي گول تك اوزيوي بير آنا تك باسدي ماچا!

     ((هم سهنديه سهندين داغين ائتدي باش اوجا

     هم سن اوز قارداشيوين حقيني ايفا ائله دين))

 

چوخلاري ائتدي خيانت ديله گزديرمه ده ال

دئديلر توركوده اولماز يازيلا شعروغزل

سن ياراتدون او زامان شعروغزل چوخدا گوزل

      ((آجي ديللرده شيرين توركو اولوردو حنظل

      سن شيرين ديللره قاتدين اونو حلوا ائله دين))

 

ادبين زينتي دير مولا فضولي چيچه گي

حيرانين دوپ دولودور شعروغزلدن اته گي

وئرميش آنجاق كي نسيمي اليوه گول چله گي

    ((هرنه قالميشدي كئچنلردن ائله بال پتگي

     اريديب موملو بالين شهد مصفا ائله دين))

 

ائليميز اصلي كرم خانيله سارا ائليدير

ديليميز سازو دف وتاريله سورنا ديليدير

اوشاغا دادلي ناغيل كورپه يه رويا ديليدير

      ((توركو واللاه آنالار اوخشاغي لايلا ديليدير

      درديوي سن بو دوائيله مداوا ائله دين))

 

ائليميز اوز ديلينه تاپماييب ايمان هله ده

اولماييب درديميزه ياخشيجا درمان هله ده

گوزون آچ گوركي "نير اوغلو" ائدير افغان هله ده

((شهريار، حيف سويوخدور بو دگيرمان هله ده

دارتماغا يوخدو دني سنده مدارا ائله دين))

 

روزبه صمدي((نير اوغلو))
 

 

گجيل سايتي ركلاملاري وئريلن سايتلارين محتواسيندان سوروملو دئييل.
 بو ركلاملار ايراندا ، آذربايجان سايتلارين آرتيق راق تانيتديرماق اوچون بوردا ويريليب ديلار.



گجيل سايتي لينکي وئريلن سايت يا يازيلارين محتواسيندان سوروملو دئييل.

E-mail : webmaster@gajil.20m.com
Copyright © 2003-2004.