دريا ائله ديم

توركو بير چشمه ايسه من اونو دريا ائله ديم،

بير سويوق معركه ني محشر كبرا ائله ديم.
 

بير ايشيلتي ايدي سها اولدوزو تك گورسنمز،

گوز ياشيملا من اونو عقد ثريا ائله ديم.
 

اومودوم واركي بو دريا هله اوقيانوس اولا،

اونا ضامين بو زمينه كي مهيا ائله ديم.
 

عرفانا چاتماسا شعرو ادب، ابقا اولماز،

منده عرفانا چاتيب شعريمي ابقا ائله ديم.
 

ابديتله ياناشديم دوغولا حافيظه تاي،

شيرازين شاهچراغين تبريزه اهدا ائله ديم.
 

توركونون جانيني آلميشدي حياسيز طاغوت،

من حيات آلديم اونا حق اوچون احيا ائله ديم.
 

فيض روح القدس اولدي مدديم حافيظ تك،

منده حافيظ كيمي اعجاز مسيحا ائله ديم.
 

قمه قداره لر آغزيندا ديل اولموشدو سويوش،

من سئوينج ائتديم اوني، خنجري خورما ائله ديم.
 

ايندي گوللرده گوزل صفله صفاايله گزير،

منجلابلاردا اوزن اوردگي دورنا ائله ديم.
 

باخ كي حيدربابا افسانه تك اولموش بير قاف،

من كيچيك بير داغي سرمنزل عنقا ائله ديم.
 

بوردا روشن ضميرينده هنرين ياد ائده ليم،

من اونوندا قلمين طوطي گويا ائله ديم.
 

نه تك ايراندا منيم ولوله سالميش قلميم،

باخ كي توركييه ده قافقازدا نه غوغا ائله ديم.
 

باخ كي تهراندا نه فرزانه لر اولموش واله،

باخ كي تبريزده نه شاعيرلري شيدا ائله ديم.
 

هم سهنديه سهندين داغين ائتدي باش اوجا،

هم من اوز قارداشيمين حقيني ايفا ائله ديم.
 

آجي ديللرده شيرين توركو اولوردو حنظل،

من شيرين ديللره قاتديم اونو حلوا ائله ديم.
 

هرنه قالميشدي كئچنلردن ائله بال پتگي،

اريديب موملو بالين شهد مصفا ائله ديم.
 

توركو، واللاه ، آنالار اوخشاغي، لايلا ديليدير،

درديمي من بو دوائيله مداوا ائله ديم.
 

شهريار، حيف سويوخدور بو دگيرمان هله ده،

دارتماغا يوخدو دني ،منده مدارا ائله ديم.

شهريار