Gajil,Gecil,گجيل
 

گجيل

 
شعر - ناغيل
يازيلار - مقاله لر
اسماعيل جميلينين شعرلري
     
 

آذربايجان سسي

كونلوم ايستير گلسين هر ياندان آذربايجان سسي

سسله ننده جان باغيشلير جانلارا جانان سسي

ايلغارا آند ايچميشيك بيز، اولدو واردير دوندو يوخ

تا آذربايجانلي وار باتماز آذربايجان سسي

 ايندي يوخ دعواسي ايرانيله تورانين داها

قورخودا افراسيابي رستم دستان سسي!!

ايندي هر ديلده هر آيينده بشر صلح آختارير

خلقه خوش گلمير داها شمشير سسي قالخان سسي

ايسته مز فردوسي شاهلاردان بيزه دستان دئسين

ايندي خلق ايستير كسيلسين هاردا وار سلطان سسي

ايندي آزادليق يولوندا قهرمانلار جان وئرير

كار ائده ر مخلوقي چيخسا بير بئله قوربان سسي

سانما ستارخان ياتيبدير قورخودان سسلر باتيب

ايندي ستارخان ائلينده چوخدو ستارخان سسي

قلعه سينده بابكين سس باتماييبدير اينديده

واردي دائيم بابكيله باغلانان پيمان سسي

تولكو اصلان اولمايان يئرده اوزون سلطان بيلير

الفرار ائيله ر اوزاقدان دينله سه اصلان سسي

قوربانام آنجاقكي آذربايجانين جانيندا

چونكي اوندا آذر و بايدا سونرا واردير جان سسي

موسيقي آلتلريندن جوربه جور سسلر چيخير

شور سسي، زابل سسي، شيراز و دشتستان سسي

سانكي قارمان ديل آچاندا اوز ديليمده ديل آچيب

ديلله ننده روحوما لاي- لاي دئيير قارمان سسي

سورتوشور آرشا كمانه توققوشور مضراب تارا

گه اولور صحبت وصالدان گاه گلير هجران سسي

لزگي رقصي باشلاناندا ناغارالار فرياد ائدير

شاپپالار ده يديكجه گومبولدور گلير طوفان سسي

هر زمان كر دسته سي برنامه سين اجرا ائدير

بولبولي حيران ائدير قيز سسي اوغلان سسي

بو گوزلليكده ((سخا)) انصاف دئييل سسلر باتا

تا آذربايجانلي وار باتماز آذربايجان سسي

حميد سخامير

 

 

گجيل سايتي ركلاملاري وئريلن سايتلارين محتواسيندان سوروملو دئييل.
 بو ركلاملار ايراندا ، آذربايجان سايتلارين آرتيق راق تانيتديرماق اوچون بوردا ويريليب ديلار.


 


گجيل سايتي لينکي وئريلن سايت يا يازيلارين محتواسيندان سوروملو دئييل.

E-mail : webmaster@gajil.20m.com
Copyright © 2003-2004.