آتا ميللت، آنا ميللت آغلاما

پنجره ني كولك دويوب آغلاسا

ائيوانينا قوشلار قونوب آغلاسا

اوره ييني كولك يونوب آغلاسا

ايچينده يان، آغي دئيب آغلاما

آغلاماغين يئري دئييل، آغلاما

بو دويوشدو، ازيلن وار، ازن وار

اولوم حوكمو قولتوغوندا گزن وار

بوردا بيزيك نه من واردير نه سن وار

يوخ آغلاما، آنا ميللت، آغلاما

قورخورام كي، سينا ميللت، آغلاما

هايقير: كونول بوندان بئتر چاغ هاني؟

اينسان يانير، تورپاغ يانير، داغ يانير!

باجيم، ايندي آغلاماغا واخت هاني؟

قارداش دئيب، يوردداش دئيب آغلاما

آغلاماغين يئري دئييل آغلاما

اه ييلمكدير آغلاماغين ترس اوزو

دردي دارتيب اوزمه ييني درد اوزو...

آغلاياني تئزده تاپير دردي حوضور

بلكه تانري بئله يازيب، آغلاما

سسيني بوغ، ميللت قيزي، آغلاما

بو تورپاغين سون قورباني من اولسام

اوز اودوندا يانيب كوله تن اولسام

ائلدن اوته ن گولله لره دن اولسام

آتا ميللت، اوغول دئيب آغلاما

آغلاماغين يئري دئييل آغلاما

 ممد آراز